أقدارى ومكتوبي
بيشد الوقت ف ثوبى
فجأة ياخدنى
فوق ضهره ويجرى
وأنا وياه
مش داريه بنفسى
ولا عارفه يومى من أمسى
لو مرة صرخت أفكارى
وتعبت م الدوران أحوالى
يجرى
ويلفعنى بأدوارى
أبكى وارمى همومى ف صدرى
ولا على باله
يرمح . يصبح . جامح
سارح . سابح
بيا وبين حواليا
فجأة يتمرد جوايا عليا
انا وحشانى
عايزة القانى
أرتاح ويايا أكلمنى
اكتب ليا وعنى ومنى
أنا حبانى
تهدى اللحظة
ويرجع تانى يشد ف توبى
وأنا منساقة
وازاى أهرب من أقدارى
ومن مكتوبى
ليست هناك تعليقات:
إرسال تعليق