الفارس فى حواديتي
(1)
طار الكلام منى
سرق الزمن سنى
طقطق سواد شعرى
كرمش يا حلم العين
سبق النهار الليل
بربش وشاف برقك
سيل الحنان قلبك
فيه عمر ما عشتوش
فارس بأحلا حصان
ساكن فى حواديتى
حاطلق بخور فرحى
والله يا جرحى كتير
حابسه غنا العصافير
باستنى ف هلاله
يفوت على الأبواب
ويجينى مرساله
جبل السكات عالى
كترت ساعات النوم
بستنى مواله
يحلم بموالى
(2)
نادينى أجيلك
وأدوب حنينك
واخفق شرودك
وارمى اللى عفر
ملامح وجودك
يا غالى وعالى
ورامى سهامك ف عمرى
يا عمرى بادور عليك
ف وسط الدواير
يا حاير وداير
وفاير مشاغل
يا عقلى وقلبى
وضى ف عيونى
بادور عليك
(3)
حسك بكونى شدنى
وهج المشاعرلفنى
لحظة وجودنا تضمنى
شوقك طوانى وهزنى
بدر كسوفى ف رقتك
ملهوفة روحى لسكتك
ولقيني طوع لكلمتك
وسألتنى
أقدر أكون ف صحبتك
وأكون ف عالم دنيتك
ضيك جذبنى قلت آه
ولفنى بطوق المنى
أنت وأنا
شوق الطبيعة والغنا
ليست هناك تعليقات:
إرسال تعليق